Yena aplicacion y ricibi bo ‘Carnet di Atleta’ na oficina di IBiSA Instituto Biba Saludabel y Activo, IBiSA aña pasa a introduci un ‘Carnet di Atleta’. E idea a surgi despues di evaluacion di caredanan grandi, cu e meta pa facilita un participante na momento di inscribi su participacion na un actividad. Aki ta resulta, cu si IBiSA tin tur dato di un participante den su ‘database’, un inscripcion por bay hopi mas liher. Despues di varios careda, ta keda constata cu esaki definitivamente ta e caso y esnan cu tin nan carnet ta uze ora di inscribi y ta keda cla den minimo di tempo.
Abo tin dibo ?
Hopi ta esnan cu a haci uzo di e oportunidad aki y a acudi na oficina principal di IBiSA, situa na Frankrijkstraat 1 pa yena un aplicacion y despues ricibi nan carnet. IBiSA ta invita esnan cu a yena nan aplicacion y haci e peticion pa ricibi nan carnet di atleta, y no a busca esaki ainda, pa pasa durante ora di oficina for di 7:30 a.m. pa 12:00 p.m. y for di 1:00 p.m. pa 4:30 p.m. y reclama nan carnet na balie cerca e recepcionista.
Aplicacion ta GRATIS:
En conexion cu preparacion pa e gran careda di “Aruba International Half Marathon 2015” cu ta tuma lugar den luna di maart, IBiSA ta invita tur esnan cu no a yena aplicacion ainda pa ricibi nan carnet di atleta, pa haci esaki mas pronto cu ta posibel. Aplicacion pa e carnet di atleta ta completamente gratis. Haciendo esaki awor, bo ta ricibi bo carnet ainda prome cu inscripcion pa Aruba su International Half Marathon cuminsa. Asina ta, percura pa bo tin dibo.